Mimoza Kusari-Lila është kryetare e Partisë Alternativa dhe deputete në Kuvendin e Republikës së Kosovës. Ajo është kryetare e grupit parlamentar të Lëvizjes Vetëvendosje (LVV). Znj. Kusari-Lila është anëtare e Komisioni për Ekonomi, Industri, Ndërmarrësi dhe Tregti. Ajo ka shërbyer si Zëvendëskryeministre e Republikës së Kosovës dhe Ministre e Tregtisë dhe Industrisë nga viti 2011-2013 dhe ka qenë Kryetare e Komunës së Gjakovës nga nëntori i vitit 2013 deri në vitin 2017. Mimoza Kusari-Lila hyri në politikë vitin 2003 kur mori pozitën e zëdhënëses dhe këshilltares politike të kryeministrit të atëhershëm të Kosovës, Bajram Rexhepi. Ajo ishte zëdhënëse e qeverisë së Kosovës për më shumë se një vit. Ajo u bë gruaja e parë që mori detyrën e kryetares së një komune në historinë e Kosovës. Kusari-Lila ka përfunduar studimet e nivelit master në Universitetin Duquesne, në Pitsburg të Pensilvanisë. Kusari-Lila ka studiuar përmes bursës “Ron Brown Scholarship Program”.

Hykmete Bajrami është deputete në Kuvendin e Kosovës nga rradhët e Lidhjes Demokratike të Kosovës (LDK). Ajo u zgjodh deputete për herë të parë në legjislaturën e katërt më 2011. Më 2014, u emërua Ministre e Ministrisë së Tregtisë dhe të Industrisë në Kosovë dhe shërbeu deri në vitin 2017. Nga muaji shkurt deri në qershor të vitit 2020 ka sherbyer si Ministre në Ministrinë e Arsimit, Shkencës dhe Teknologjisë. Ajo ka shërbyer edhe si Ministre e Financave prej vitit 2020 derin në vitin 2021. Znj. Bajrami ka përfunduar studimet bachelor në Fakultetin Ekonomik të Universitetit të Prishtinës, Dega Menaxhment dhe Informatikë. Ajo përfundoi studimet master në Universitetin Staffordshire në Angli në vitin 2003 si bursiste. Në vitin 2011 ka përfunduar studimet e doktoraturës në Universitetin e Prishtinës, Fakulteti Ekonomik. Znj. Bajrami është pjesë e stafit akademik të Fakultetit Ekonomik të Universitetit të Prishtinës që nga viti 2004. Është autore e një sërë tezash akademike dhe artikujsh shkencorë të botuar në revista të ndryshme ndërkombëtare.

Bali Muharremaj është kryetar i komunës së Suharekës. Prej vitit 2011 deri 2017 ka qenë deputet në Parlamentin e Kosovës në grupin parlamentar të Aleancës për Ardhmërinë e Kosovës (AAK). Gjatë viteve 2010-2011, Muharremaj ka qenë nënkryetar i komunës së Suharekës, ndërsa më herët ka punuar në Ministrinë e Punëve të Brendshme si Drejtor për Azil dhe Migracion. Prej vitit 2001 deri 2005 ka punuar si drejtor regjional për Siguri Civile dhe Gadishmëri Emergjente në Prizren. Ai ka përfunduar studimet në Fakultetin Ushtarak në Departamentin e Mbrojtjes të Universitetit të Beogradit.

Svetlana Stefanović është drejtore ekzekutive e Fondacionit BFPE për një shoqëri të përgjegjshme. Ajo është përgjegjëse për zhvillimin e fondacionit dhe punëtorëve, si dhe për hartimin dhe zbatimin e strategjisë për zhvillimin e fondacionit. Nga viti 2019 deri në vitin 2022, ajo ka punuar në Fondacionin BFPE për për një shoqëri të përgjegjshme si koordinatore e programit ku ishte përgjegjëse për konceptimin, koordinimin dhe zbatimin e programeve gjinore. Gjithashtu, që nga viti 2021, ajo është pika kontaktuese për fazën e dytë të programit ROMACTED. Ajo ka mbi pesëmbëdhjetë vjet përvojë profesionale në menaxhimin e projekteve afatgjata dhe komplekse, si dhe përvojë të gjerë në menaxhimin e ngjarjeve të mëdha dhe komplekse si forumet, konferencat, debatet etj. Ajo ka përvojë në udhëheqjen e ekipeve të ndryshme, si dhe në trajnime, përgatitje dhe vlerësim të projekteve të ndryshme. Svetlana është një specialiste e njohur me përvojë profesionale në zhvillimin dhe krijimin e programeve të mentorimit dhe ka mbi 10 vjet përvojë pune në mentorim dhe ndërtim të kapaciteteve të të rinjve me fokus të veçantë për gratë e reja. Ajo është një nga anëtarët e ekipit origjinal që themeloi historinë e suksesit të Forumit të Sigurisë së Beogradit BSF në 2011 dhe deri në vitin 2021 ajo ishte drejtore ekzekutive e BSF, përgjegjëse për organizimin e përgjithshëm dhe realizimin e BSF ku drejtoi një ekip prej katërmbëdhjetë personash. Nga viti 2003 deri në vitin 2018 ka qenë vullnetare, aktiviste në projekte të ndryshme në Lëvizjen Evropiane në Serbi, më pas ka punuar si menaxhere e zyrës dhe menaxhere e projekteve dhe e eventeve. Ajo është një nga themelueset dhe anëtare e qeverisë së grave që nga themelimi i saj në 2007. Ajo është anëtare e Bordit të Programit të Akademisë së Udhëheqjes së Grave. Nga viti 2019 deri në vitin 2021, ajo ishte anëtare e Bordit Ekzekutiv të Shoqatës Fulbright dhe Friends. Ajo është anëtare e Forumit për Marrëdhëniet Ndërkombëtare të Lëvizjes Evropiane në Serbi. Ajo mori pjesë në Programin Ndërkombëtar të Udhëheqjes së Vizitorëve "Gratë në Udhëheqje: Përparimi i grave, avancimi i njerëzimit" në SH.B.A. dhe ajo është një alumna e këtij rrjeti. Gjithashtu, ajo është alumna e Shkollës së Studimeve Politike të BFPE dhe COE dhe alumna e programit Mashav. Ajo ka diplomuar për Marrëdhënie Ndërkombëtare në Fakultetin e Shkencave Politike, Universiteti i Beogradit. Fushat e saj të interesit përfshijnë marrëdhëniet ndërkombëtare, sigurinë njerëzore, të drejtat e grave, mentorimin dhe arsimin joformal. Ajo shkruan dhe boton artikuj mbi këto tema. Ajo flet anglisht.

Iliriana Gashi shërben si Drejtore Ekzekutive në Kosova - Women 4 Women (K-W4W), ku menaxhon programe që i kanë shërbyer më shumë se 35,000 grave që nga viti 1999. Në vitin 2017, Dr. Gashi udhëhoqi tranzicionin e programit Women for Women International në Kosovë për t'u bërë një OJQ e pavarur lokale: Kosova – Women 4 Women (K-W4W). Para se t'i bashkohej Women for Women International, Dr. Gashi ka punuar për Agjencinë Kanadeze për Zhvillim Ndërkombëtar, World Vision, Ambasadën Franceze në Kosovë, Bankën Botërore dhe Aleancën Ndërkombëtare të Shëndetit Amerikan (AIHA). Ajo ishte gjithashtu anëtare e Komisionit për Politikë dhe Planifikim në Ministrinë e Shëndetësisë së Kosovës. Dr. Gashi është mjek i mjekësisë me diplomë Master në Menaxhim të Administrimit të Kujdesit Shëndetësor nga Universiteti i Lozanës në Zvicër. Ajo shërben në Bordin e Rrjetit të Organizatave të Grave Rome, Ashkali dhe Egjiptiane të Kosovës, shërben si anëtare e bordit të Platformës CiViKos dhe është anëtare e Klubit Ndërkombëtar Soroptimist në Prishtinë.

Leonora Kusari është koordinatore regjionale në Bankën Europiane për Rindërtim dhe Zhvillim (BERZh). Përgjatë përvojës së saj gati dy-dekadëshe, Kusari ka mbajtur disa pozita të ndryshme në BERZh që i kanë mundësuar zhvillim e saj në aspekte të ndryshme si menaxhment dhe informatikë, financa dhe kontabilitet, analiza statistikore ekonomike, menaxhim i shitjeve, e kështu me rradhë. Kusari ka përfunduar studimet e saj për marketing dhe informacion në Universitetin e Prishtinës.

Behar Jashari drejton krahun rinor të Lëvizjes Vetëvendosje (LVV) të njohur si “Rinia për Vetëvendosje!”. Angazhimin politik aktiv në LVV e ka filluar në vitin 2019 si vullnetar në fushatën zgjedhore të atij viti. Më pas, në fushatën e shkurtit 2021 ka udhëhequr departamentin e vullnetarëve në kuadër të Shtabit Zgjedhor të Prishtinës. Në zgjedhjet lokale të tetorit 2021, ka qenë kandidat për Këshilltar Komunal në Kuvendin Komunal të Prishtinës, ndërkaq gjatë periudhës së balotazhit në po atë kampanjë zgjedhore ka shërbyer përsëri si koordinator i departamentit të vullnetarëve. Ka punuar si vullnetar në organizata joqeveritare e projekte të ndryshme, si dhe pjesëmarrës në konferenca e seminare, të cilat përgjithësisht kanë pasur fokus çështjet e arsimit dhe mjedisit. Ka qenë anëtar i Këshillit të Nxënësve të Prishtinës (KNP) për dy vite gjatë shkollimit të mesëm; pjesëmarrës në aktivitete të Këshillit të Veprimit Rinor Lokal (KVRL) dhe Kosovar Youth Council (KYC); anëtar kryesie në organizatën studentore STUDIM KRITIKË VEPRIM në periudhën prill 2020 – mars 2021; anëtar i Kosovo Organization of Medical Students (KOMS); vullnetar në Qendrën për Hulumtime Psiko-Sociale dhe Mjekësore (QHPSM); pjesëmarrës në një projekt njëvjeçar për rivitalizimin e aktivizmit studentor të organizuar nga Organizata për Rritjen e Cilësisë në Arsim (ORCA); vullnetar në projekte të Green Art Center (GAC) për menaxhimin e mbeturinave të ngurta dhe mbrojtjen e mjedisit; pjesëmarrës aktiv në ngjarje që ndërlidhen me shëndetësinë, arsimin, mjedisin dhe kulturën. Aktualisht vijon studimet për mjekësi të përgjithshme në Fakultetin e Mjekësisë të Universitetit të Prishtinës “Hasan Prishtina”.

Arbnorë Salihu është anëtare e kuvendit komunal të Ferizajit si dhe kryetare e Rinisë Demokratike të Partisë Demokratike të Kosovës (PDK). Ajo ka përfunduar studimet master për politika publike dhe menaxhment në Universitetin e Prishtinës.